恭喜男子排球隊獲得亞軍及女子排球隊獲得殿軍!

特別感謝每一位親身到現場支持，拼命地嗌既家長老師舊生們，不論小朋友有無落場，每一位家長都真係出盡力嗌「光明」，全憑大家既打氣聲令運動員們可以拼到最後一刻。

男子隊係四強比賽時狀態回勇，團結一致，越打越有火，屢救險球，殺入決賽。決賽既時候面對逆境波，部份同學未能抵受壓力，中段已經喊緊。幸好隊中有六年級同學一直帶領住大家嗌光明 鼓勵大家，撐到最後一刻。比賽係輸左，但大家都真係無放棄，真心欣賞。呢場比賽可以見到個別同學既成長，亦為大家帶黎一次非常寶貴既經驗。將來再次面對逆境相信佢地可以處理得更好，面對逆境亦係做所有運動最需要學習既地方。

女子隊狀態起伏較大，早兩個星期測完驗狀態較差，幸好大家經過賽前既友誼賽、訓練、心理輔導等等…重拾狀態。賽前目標係大家可以係球場入面笑住比賽、互相鼓勵、享受比賽，大家都真係可以做得到。比賽期間有雖然有隊員都好驚好緊張，但係都一直忍住又去安慰其他隊友，甚至去引隊友笑，直到完場一刻先大爆發喊出黎，見到大家既成長比起勝利更加更要。

一年比賽完結，又係時候準備來年比賽，祝願六年級準備畢業既大家，將來係球場發光發亮。

未畢業既大家 黎緊繼續努力!